«

»

Sep 24

༧གོང་ས་མཆོག་གི་དམིགས་བསལ་བཀའ་སློབ།

༧གོང་ས་མཆོག་གི་བཀའ་སློབ།

(དེ་རིང་ཕྱི་ཚེས་ ༢༣ ཉིན་གྱི་ཞོགས་པའི་ཆུ་ཚོད་ ༨ དང་ཕྱེད་ཀའི་སྟེང་།  བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་༧སྐྱབས་མགོན་ཆེན་པོ་མཆོག་དབུ་བཞུགས་ཐོག   བོད་ཀྱི་ཆོས་བརྒྱུད་ཆེན་པོ་ཁག་དང་གཡུང་དྲུང་བོན་བཅས་ཀྱི་བླ་ཆེན་རྣམས་ལྷན་བཞུགས་ཀྱིས།  ཉེ་ཆར་འབྲུག་དང་འབྲས་ལྗོངས་གཙོས་པའི་བལ་བོད་ཁུལ་དུ་ས་ཡོམ་ཀྱི་གནོད་འཚེའི་ཁྲོད་རྐྱེན་འདས་སུ་སོང་བ་རྣམས་ཀྱི་ཆེད་བསྔོ་སྨོན་གསུངས་ཤིང་།  དེའི་རྗེས་སུ ༧གོང་ས་༧སྐྱབས་མགོན་ཆེན་པོ་མཆོག་ཆོས་ལུགས་ཚོགས་ཆེན་ཐེངས་བཅུ་གཅིག་པའི་ཚོགས་མགོན་ཏུ་ཆིབས་བསྒྱུར་བསྐྱངས་ཏེ།  ཚོགས་བཅར་ཡོངས་ལ་བཀའ་སློབ་ཟབ་མོ་གནང་བའི་ནང་ནས་ཇོ་ནང་པའི་སྐོར་ཡིག་ཐོག་ཏུ་ཕབ་པ།)

ད་ལྟ་ཇོ་ནང་གི་ཆོས་བརྒྱུད་ཀྱིས།   ད་ལན་ཉེ་ཆར་ང་རང་ཚོར་སྙན་ཞུ་ཞིག་ཕུལ་འདུག་ལ།   ང་ལ་ཡང་ཡི་གེ་ཞིག་འདུག   བྱས་ཙང་ད་ཐེངས་ཇོ་ནང་སྐོར་ཐག་གཅོད་དགོས་ཀྱི་ཡོད་ཅེས་བྲིས་འདུག  ཇོ་ནང་སྐོར་ངས་ནམ་རྒྱུན་བཀའ་ཆོས་སྐབས་ལ་བཤད་བསྡད་ཀྱིན་ཡོད།   དངོས་གནས་གང་བཤད་ན་མ་བཤད་ན་དུས་ཀྱི་འཁོར་ལོའི་སྦྱོར་དྲུག་གི་ཉམས་ལེན་ཐོག་ཕྱིན་པ་ཡིན་ན།    ཇོ་ནང་གིས་ད་ལྟ་བར་དུ་བསྟན་པ་བཟུང་ནས་བསྡད་བཞག་ཡོད་པ་རེད།    དེ་དངོས་གནས་བཀའ་དྲིན་རྗེས་སུ་དྲན་དགོས་པ་ཞིག་རེད།  ཡག་པོ་ཞེ་དྲགས་རེད།   ལྟ་བ་རང་སྟོང་དང་གཞན་སྟོང་ཟེར་བ་དེ་ཁོ་ཁོ་རང་ཚད་མཐོན་པོའི་རྒང་ལ་འགྲོ་བསྡད་ཡོད་པ་རེད།   དེ་ཁྱད་པར་གང་ཡང་མི་འདུག    ངས་ནམ་རྒྱུན་བཤད་བསྡད་ཀྱིན་ཡོད་པ་ཞིག་དང་།  སེམས་ལ་ཤར་བསྡད་པ་ཞིག་ཡོད།   དེས་སེམས་ལ་ཞེ་དྲགས་ཕན་གྱི་འདུག    དེ་ཇོ་ནང་གི་བླ་སྒྲུབ་ཅིག་གི་ནང་གི་ཚིག་ཞིག་རེད།   སྒྱུ་མའི་རང་སྣང་རྗེན་ནེ་ནེ༎   གཏད་མེད་རིག་པ་གསལ་ལ་ལ༎  བརྗོད་མེད་དབྱིངས་སུ་ཐལ་ལ་ལ༎  བདེ་བ་ཆེན་པོ་ཁྲིལ་ལི་ལི༎    ཡག་པོ་འདུག་ཀ   འདི་ལྟར་བསམ་བློ་བཏང་བ་ཡིན་ན།   ཕྱི་བཟུང་བ་བདེན་མེད་སྒྱུ་མ་ལྟ་བུ་དང་།   ནང་འཛིན་པ་བདེན་མེད་ཡང་སྒྱུ་མ་ལྟ་བུ་རེད།   དེ་ནས་བསམ་བློ་ཞིག་བཏང་ཡོང་དུས་ཕྱི་བཟུང་བ་ཡུལ་དང་ནང་འཛིན་པ་སེམས་གཉིས་ཀ་དམིགས་གཏད་གཅིག་ཡིན་དུས་ས་ནས་བརྗོད་མེད་དབྱིངས་སུ་ཐལ་ལ་ལ།   གསུངས་པ་རེད།   དེའི་ངང་དུ་བསྡད་པ་ཡིན་ན་དེའི་ངེས་ངོ་ལ་སྤྲོས་པ་མཐའ་ཉེ་བར་ཞི་ནས་སེམས་གསལ་སེང་ངེ་འགྲོ་བསྡད་པ་འདྲ་བོ་ཞིག་ཡོང་གི་འདུག་ཀ   དེའི་སྔོན་དུ་རྫོགས་རིམ་དང་མཐུན་པའི་རྟོགས་པ་མཐོན་པོ་ཡོད་ན་མེད་ན་ཁ་ཐུག་དེར།   བྲལ་བའི་དུས་ན་སེམས་ཀྱི་གཞོན་ནུ་དེ༎   བརྗོད་བྲལ་ལམ་གྱི་གོང་བུར་ངལ་གསོ་བསྟེན༎   ཞེས་གསུངས་པ་དེ་ག་རང་རེད་པ།  ཡག་པོ་འདུག་ཀ
རེད་པ།   སྔོན་ལ་གཞན་སྟོང་རང་སྟོང་ཟེར་བ་དེ་ཡར་ཞིག་ལ་ཞོག
(བཞད་མོ་དང་བཅས།)  སྔོན་ལ་སོ་སོའི་ཁ་ཐུག་དེར་དངོས་གནས་རང་གི་སེམས་ལ་ཕན་པ་ཞིག་དང་།   སྒོ་གསུམ་ཞི་ཞིང་དུལ་བ་ཞིག་བྱུང་ན་དེས་འགྲིག་འདུག་ཀ   ངའི་ངོ་ཤེས་པ་ཨ་མེ་རི་ཀའི་མི་ཞིག་གིས།   ཁོ་མགོ་ལོག་ལ་གནས་སྐོར་དུ་ཕྱིན་པ་ཡིན་ཟེར།   བཀྲ་ཤིས་འཁྱིལ་དང་དེ་ཚོར་མཚམས་བསྡམས་ནས་ཡུན་རིང་པོར་བཞུགས་མཁན་ཡོད་ཟེར་བ་དེ་འདྲ་གོ་ཡ་མི་འདུག   མགོ་ལོག་འཛམ་ཐང་ཁུལ་དུ་(དེ་ཇོ་ནང་རེད།)མཚམས་ལ་བཞུགས་མཁན་མང་པོ་ཞེ་དྲགས་འདུག   ཁོའི་ཡིད་ཞེ་དྲགས་འཕྲོག་སོང་ཟེར་གི་འདུག  དཔེ་ཡག་པོ་རེད་པ།   དེ་འདྲ་ཡིན་དུས།  སྤྱིར་བཤད་པའི་ཀ་ཆེན་བཅུ་དང་།   སྒྲུབ་རྒྱུད་ཤིང་རྟ་བརྒྱད་ཀྱི་ནང་ན་ཇོ་ནང་པ་ཡོད་པ་རེད་པ།   བྱས་ཙང་དེ་གནད་འགག་ཅིག་འདུག  ངས་ཡང་འདི་བྱོས་འདི་མ་བྱེད་ཅེས་ང་ལ་བཤད་ཡ་གང་ཡང་མེད་དེ།   ཡིན་ན་ཡང་།  ཁྱེད་རང་ཚོས་དབྱིན་ཇིའི་སྐད་ཐོག་ནས་(serious)དོན་གནད་གལ་ཆེན་པོ་ཞིག་ལ་དགོངས་པ་བཞེས་དགོས་ཡ་ཞིག་རེད།   དེར་གནད་འགག་ཅིག་འདུག   ང་རང་གི་ངོས་ནས་ཁོང་ཚོས་ང་ལ་ཡི་གེ་ཞིག་བྲིས་པ་རེད།  ངས་དེ་བཤད་ཡོད་དོ་ཞེས་ཁོང་ཚོར་ཕར་ལན་སྤྲད་ཀྱི་ཡིན།  ཤེས་སོང་ངམ།
(བཞད་མོ་བཅས།)  དེ་རིང་ངས་ལབ་སྙིང་འདོད་པ་དེ་ཚོར་ཆོ་མི་འདུག  ང་རང་གིས་ཞྭ་མོ་དེ་ཕུད་པ་ཡིན།  ཁྱེད་རང་ཚོས་ག་རེ་གནང་འདོད་པ་ཁྱེད་རང་ཚོས་ཐག་བཅད་དགོས་རེད།  བཀྲ་ཤིས་བདེ་ལེགས།  ཐུགས་རྗེ་ཆེ།
ཞེས་བཀའ་བསྩལ།

༧གོང་ས་མཆོག་གི་བཀའ་སློབ་ངོ་མར་གསན་གཟིགས་གནང་འདོད་ཡོད་ན།    གཤམ་གྱི་འབྲེལ་ཐག་ཐོག་ཕེབས་རོགས།

Dalai Lama-jonang2011

འདིར་མནན་ནས་ཀུན་གླེང་བགྲོ་གླེང་ལ་གཟིགས་རོགས་ཞུ།

 

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>